Sektor privá i públiko ta traha huntu na un strategia teritorial-ekonómiko pa Kòrsou
Resientemente a organisá un tayer di trabou ku gruponan di interes di diferente sektor sosial pa papia tokante e desaroyo di un strategia teritorial-ekonómiko pa Kòrsou. E tayer di trabou ta den kuadro di reformanan den e maneho di teritorio i bienes. E Programa Teritorio i Bienes (Programma Grond en Vastgoed) ta forma parti di e Pakete Nashonal i ta konsistí di 12 proyekto ku ta dirigí riba reforma i profeshonalisashon e maneho di teritorio i bienes (inkluso atministrashon) di gobièrnu di Kòrsou.
Durante e tayer di trabou tres tema tabata sentral: turismo komo pilá ekonómiko, transishon di energia i e suministro propio di Kòrsou riba tereno di produkshon di kuminda. E temanan aki ta trese teritorio i ekonomia huntu. Pa papia tokante e temanan aki a invitá representantenan di gobièrnu, sektor privá, sindikato i institutonan di konosementu ku e ophetivo pa traha huntu pa yega na un strategia teritorial-ekonómiko pa Kòrsou den e próksimo periodo. No ta trata solamente e oportunidatnan (por ehèmpel transformá energia solar i di bientu den hidrógeno), pero tambe puntonan di atenshon (garantisá distribushon di energia miéntras demanda di hotèlnan ta sigui subi), un vishon ku ta komprometé, e strategia i e focus nesesario (manera seguridat di kuminda), eskohonan i kompromiso.
Organisashon di Trabou Temporal (TWO) a kontratá señor Henk Jagersma pa duna sosten komo eksperto na e Programa di Teritorio i Bienes. E programa aki ta kai bou di e responsabilidat di maneho di Ministerio di Tráfiko, Transporte i Trafikashon Urbano (VV&RP). Señor Jagersma a duna un presentashon durante di e tayer di trabou tokante di e desaroyo ekonómiko di Kòrsou den e último añanan i e eskohonan riba tereno di maneho di teritorio pa e ekonomia di Kòrsou di futuro.
Ministernan Charles Cooper (VV&RP) i minister Ruisandro Cijntje (MEO) tambe tabata presente na e tayer di trabou. MEO ta responsabel pa e parti di desaroyo ekonómiko ora konkretisá e strategia. Minister Cooper na apertura di e workshop: “Ta importante pa banda di e ministerionan di MEO i GMN, sektor privá tambe ta representá, pa asina tin koperashon di sektornan privá i públiko. Empresarionan ta forma e ekonomia, nan ta mira oportunidat i posibilidat. Gobièrnu por duna direkshon i kita opstákulo. Huntu nos ta ban hasié.” E minister a para ketu tambe na e kremp den ekonomia di e último añanan i e konsekuensianan pa futuro: “E enbehesimentu di poblashon ta bai kosta hopi sèn i ta sòru pa ménos entrada. Pa hopi aña kaba Kòrsou tin défisit riba su kuenta koriente di e balansa di pago, pasó nos ta importá mas ku nos ta eksportá, ku konsekuensia ku tur aña divisa di nos ekonomia ta bai den eksterior.” Pa kambia esaki mester sigui tres punto di enfoke: promové turismo, transishon di energia manera ya kaba menshoná i e strategia di produkshon di kuminda pa Kòrsou. Tantu minister Cooper komo minister Cijntje ta mira e importansia pa traha riba esaki ku algu di urgensia. E partisipantenan di e tayer di trabou tambe ta kompartí e vishon aki. For di esaki a sali diferente idea i inisiativa.
A palabrá den e reunion aki ku den e siguiente seshonnan lo traha riba diferente senario. Tambe a wak kon den futuro por duna e kolaborashon entre e diferente gruponan di interes forma, ku énfasis riba e determinashon di esnan involukrá i implementashon di un strategia teritorial-ekonómiko pa Kòrsou.
