Invershon den waf di Kòrsou
CDM Holding i Damen Shipyards Group huntu ta invertí 40 mion dòler den Damen Shiprepair Kòrsou. E modernisashon amplio di e waf ta nifiká un fortifikashon fuerte di Kòrsou komo hub marítimo den Karibe. E invershon di 20 mion euro ku Kòrsou ta invertí ta e kontribushon ku Hulanda a primintí pa sosten pa negoshi ku ta forma parti di e sosten di emergensia pa corona.
“Bunita ku tur partido konserní por a yega na bon palabrashon huntu”, segun Sekretario di estado Alexandra van Huffelen di Relashonnan de Reino. “Ta importante pa e ekonomia di Kòrsou bai dependé ménos di turismo. E dòk sigur ta kontribuí na esaki.”
“E waf tin un posishon stratégiko den e cluster marítimo di Kòrsou”, minister Ruisandro Cijntje di Asuntunan Ekonómiko ta agregá. “E ta proveé alrededor di mil kupo di trabou direkto i indirekto i tin un kontribushon promedio di 0.6 porshento na e produkto bruto interno (bruto binnenlands product) i 4 porshento na e reservanan eksterior.”
Espasio pa estudio i entrenamentu
Tantu hürdó Damen komo CDM Holding, doño di e tereno di waf i e fasilidatnan, ta invertí den e waf. CDM Holding por hasi uso di e 20 mion euro ku Hulanda a pone disponibel pa Kòrsou. E total di e invershonnan ta prinsipalmente na benefisio di infrastruktura di e waf; partikularmente e dos dòknan ku a koba. “Asina ta garantisá ku den e añanan benidero e waf ta keda un bon ambiente di trabou, ku espasio pa posibilidat di estudio i entrenamentu.” Getmar Caldera, CEO di CDM Holding ta splika.
For di febrüari 2017 Damen ta enkargá ku e maneho di e waf ku na 1959 a kuminsá komo N.V. Curaçaose Dok Maatschappij. E situashon di, i e prospektonan di e waf for di 2017 a kambia drástikamente dor di entre otro seramentu di refineria i e terminal di zeta na Kòrsou, e ‘boycot’ di Venezuela, e konsekuensia di corona i e situashon kompletu den e sektor di krudo i gas. E waf a pasa den algun aña finansiero desepshonante.
E empresa mama di Damen na Hulanda mes a karga e pèrdida di e waf di Kòrsou den promé instante. Dor di e pandemia di corona e empresa mama no por a karga esaki mas i p’esei den zomer di 2020 a bati na porta di gobièrnu di Kòrsou i CDM Holding pa sosten. Den hèrfst di 2020 Konseho di Minister di Reino a bai di akuerdo ku un pakete di sosten mas amplio pa Kòrsou pa superá e pandemia. Esei tabata inkluso un montante di 20 mion euro pa sosten empresarial individual. Gobièrnu di Kòrsou a proponé na Hulanda pa CDM Holding i Damen Shiprepair Curaçao bin na remarke pa esaki.
Potensial
Damen Shipyards Group ta kere te ainda den e potensial den e ubikashon di Kòrsou. Pa desaroyá esaki kompletamente i keda hunga un ròl importante pa kupo di trabou na Kòrsou, tambe pa e posishon di pais komo un hub marítimo den Karibe, ta hasi e waf mas resistente ku e invershonnan aki.
E komienso di e revitalisashon di e waf di barku tabata e reorganisashon di Damen na komienso di e aña aki. “E revishon di e portanan di dòk B ku Damen a laga ehekutá turesten na yüni, ta kuadra den e plan aki i ta mustra e kompromiso di nos kompania”, segun Peter Luiten, direktor di Damen Shiprepair di Damen Kòrsou.
E ‘businessplan’ pa e waf ta konsistí di un direktiva redusí nobo, eksonerashon di e debenan i sufisiente kapital pa futuro serkano. E waf a bin na remarke pa e sosten despues ku un grupo di trabou independiente a konkluí ku e ‘businessplan’ di Damen Shiprepair Curaçao ta sufisiente faktibel.
