Un soño ekonómiko pa Kòrsou
Resientemente un grupo di ámtenar di Ministerionan di Ekonomia i Desaroyo, Salubridat Públiko, Medio Ambiente & Naturalesa, Tráfiko, Transporte i Planifikashon Urbano i Desaroyo Sosial, Labor i Bienestar huntu ku organisashonnan ku tin un ròl importante den nos ekonomia i turismo a formulá un soño ekonómiko pa Kòrsou. Pa yega na e soño a papia ku ámtenar i representante di diferente sektor i organisashon di interes manera BPM, BTP, CBCS, CHATA, CMA, CTB, VBC, KVK i Climate Change Platform i sentralnan sindikal. Banda di esei algun trahadó di ministerionan hulandes di Ekonomia i Asuntunan Interno i Relashonnan den Reino (TWO) tambe a partisipá na e seshonnan.
E soño
“Kòrsou tin un ekonomia ku tur hende por ta orguyoso di dje”, asina e soño ta kuminsá. Tur hende ta di akuerdo ku despues di un periodo largu di kresementu negativo di ekonomia nos mester logra krea un ekonomia ku ta habrí, resistente i diverso ku ta pidi rèspèt den Karibe i mas leu. “No tin pobresa mas. Nos siudadanonan ta salú i felis, tin akseso na edukashon ku ta konektá na merkado laboral i tin energia pagabel i limpi”, asina e soño ta sigui. Tambe ta sigui soña tokante e diferente pilanan ekonómiko kaminda Kòrsou por krese, manera entre otro agrikultura, ekonomia di konosementu, energia renovabel (laman, bientu, ‘deining’ i hidrógeno) en di un kresementu ekonómiko real di 3 pa 4 porshento, ya asina e pais ta bira mas riku. E soño ta kaba ku: “Traha riba nos ekonomia ta tuma hopi trabou. Nos ta hasié huntu. E partnernan sosial tin diálogo konstruktivo, gobièrnu ta fasilitá. Institutonan di konosementu, bankonan i NGO ta kue nan ròl. Huntu nos ta sòru pa tin éksito. Curaçao – where business succeeds”.
Elaborá soño den un roadmap
Awor mester elaborá riba e soño den un roadmap realístiko: kua ta e plannan ku por realisá, den ki tempu i kon? Ta dirigí e focus di e pakete di pais riba kita e asina yamá ‘redtape’ i baha e ‘cost of doing business’. A kontratá un mènedjer di programa ku ta bai traha riba e rekomendashonnan.
