‘Nulmeting’ revishon di enseñansa: reto, forsa i direkshon pa solushon
Resientemente e rapòrt final ‘Nulmeting’ di e Sistema di enseñansa di Kòrsou a keda publiká. E rapòrt final ta mustra e reto i forsa di enseñansa i ta duna direkshon di pa solushon. E ‘nulmeting’ ta den kuadro di tema G di e Pakete di pais i tin komo ophetivo pa duna loke mester pa drecha e kalidat básiko di enseñansa, e konekshon entre enseñansa i merkado di labor, i e fluho entre e diferente nivel di enseñansa.
Forsa di e enseñansa di Kòrsou
Den e revishon no ta menshoná solamente e puntonan di preokupashon, pero e forsa tambe. “Un di e forsanan di e enseñansa di Kòrsou ta ku tin inisiativa pa drecha e sistema. Dor di esaki tin diferente reflekshon i rapòrt disponibel ku konseho pa drecha e sistema di enseñansa. E rapòrtnan aki ta ekstenso i tin hopi puntonan di konekshon pa mehorá e sistema. E disposishon pa mehorá e sistema di enseñansa ta grandi,”asina ta reportá den e rapòrt. Tambe ta menshoná e trabou duru di dosentenan i e personal no-dosente. “Maske tin hopi falta di fasilidat nan ta hasi tur loke ta posibel pa duna e alumnonan un bon enseñansa. Tambe nan tin e deseo di sigui desaroyá nan mes ku enseñansa adishonal”.
Reto i direkshon pa solushon
Banda di e forsa tin reto tambe. Na promé lugá e suministro di informashon pa maneho den enseñansa i pone prioridat ta un reto. Registrashon sentral dirigí di e sifra i seri di tempu tokante resultado den enseñansa ta nesesario pa asina evaluá e maneho i tambe evaluá i monitoriá e mehorashonnan. Algun otro reto den enseñansa ta: falta di sufisiente kuido di kalidat interno i liderazgo edukativo, konekshon di edukashon pre-eskolar i skol di fundeshi, i e difikultat ku studiantenan tin pa haña nan kaminda den enseñansa avansá dor di por ehèmpel no ta sufisiente independiente i e abilidatnan nesesario pa kaba nan estudio ku éksito.
Ta duna 13 rekomendashon i nan ta repartí den tres área: 1) sòru pa disposishon di informashon dirigí, 2) reforsá e oferta di enseñansa i 3) reforsá e struktura i e sistema. Asina ta rekomendá entre otro pa organisá un sistema di registrashon konfiabel i duradero, pa invertí den e kalidat di e personal di enseñansa, pa sòru pa lei aktualisá i adekuá, i reforsá e supervishon riba e responsabilisashon finansiero.
Fase i faktibilidat di rekomendashonnan
E rekomendashonnan ta di diferente índole i ta pidi en parti pa un aserkamentu i repartí den fase den agènda di implementashon. Na mes momentu tin (parti di) rekomendashon ku por implementá relativamente lihé.
Un punto di atenshon importante na e elaborashon mas profundo di e rekomendashonnan ta e personanan disponibel pa realisá e trabou. Por pensa riba personal kualifiká, ekspertonan nesesario pa bon maneho i supervishon i spesialidat ora ta trata modernisashon di lei. Disponibilidat di e persona korekto na e lugá korekto ta importante. Banda di forsa lokal ta bon pa wak posibel kolaborashon, interkambio di perisia den region i entre paisnan den reino.
Kolaborashon di inspekshonnan di Hulanda, Aruba, Kòrsou i Sint Maarten
Pa a yega na e rapòrt inspekshon di enseñansa di Kòrsou i di Hulanda a traha huntu intensivamente. Ku esaki ta sigui elaborá riba un tradishon di e inspekshon konhunto di Kòrsou, Aruba, Sint Maarten i Hulanda. Ya pa hopi aña kaba e diferente inspekshonnan ta kompartí konosementu i idea pa yuda otro yega na un kalidat di kultura. E rapòrt aki ta tambe un sosten pa e supervishon di e inspekshon di Kòrsou riba e mehorashonnan nesesario den enseñansa i di e sistema.
Tep pa lesa
Lesa e rapòrt kompletu i e reakshon di maneho di Minister di Enseñansa, Siensia, Kultura i Deporte di Kòrsou.