Komienso di programa Atendé 'Red Tape' i 'Cost of doing business' pa stimulá klima di hasi negoshi na Kòrsou
Djamars 16 di mei, durante di e Curaçao Export Week 2023, a duna inisio na e programa di Ministerio di Asuntunan Ekonómiko pa baha ‘Red Tape’ (burokrasia) i ‘Cost of doing business’ (gastunan pa hasi negoshi) i di e forma ei stimulá e klima di hasi negoshi na Kòrsou.
Bou di guia di manager di programa Tamira La Cruz a duna informashon tokante e proyektonan ku ta bai kuminsá den e próksimo 12 luna ku e ophetivo pa hasi hasimentu di negoshi mas aksesibel i efisiente pa e empresario. Pensa por ehèmpel riba un portal di informashon kaminda tur informashon ta disponibel i un app di inspekshon pa baha burokrasia. Banda di esei ta pone atenshon na sigui digitalisá negoshi, traha mas ‘bèrdè’ i koperashon entre empresa lokal pa oumentá e eskala i redusí e gastunan di hasi negoshi.
E partisipantenan por a hasi pregunta i duna feedback riba e plannan presentá. Pa duna splikashon tokante e plannan i duna kontesta riba pregunta di públiko tabata tin representante di MEO i FTAC, presidente di Kamara di Komersio, Selikor i Aqualektra.
E programa aki ta parti di Tema E6 den e Agènda di ehekushon di Kòrsou i tin sosten di Tijdelijke Werkorganisatie (TWO). Bo ke sa mas di e proyektonan den e Pakete Nashonal? Bai na e página di Agènda di ehekushon di Kòrsou.