Ofisinanan di Impuesto ta enkontrá otro den seminario di trabou di dos dia
Resientemente, representantenan di e Ofisinanan di Impuesto di Aruba, Kòrsou, Sint Maarten i pa e Islanan di Hulanda Karibense a bini huntu pa interkambio di konosementu den un seminario di trabou. E seminario aki ta un evento konhunto di e Organisashon di trabou Temporal (TWO) i e Ofisina di Impuesto Hulanda Karibense (BCN). Meta di e seminario di trabou tabata pa kompartí progreso, éksito, i e diferente puntonan di atenshon den desaroyo di e ofisinanan di impuesto i pa stimulá kolaborashon. Tambe, e diferente partisipantenan a haña oportunidat pa sera konosí ku otro personalmente.
Claudia Toet, direktora di BCN, a habri e seminario: “Nos ta ansioso pa siña konosé otro. Kiko nos mester i unda nos por fortalesé otro? Nos tin e mesun siudadanonan i empresanan den nos fail, ei nos tin mester di otro.”
Arjen Alberts, lider di proyekto di Impuesto den TWO pa e Paketenan di Pais di Aruba, Kòrsou, i Sint Maarten: “Ku esaki nos ta duna kontenido na un parti di e Pakete di Pais. Nos ke duna impulso nobo na kolaborashon, siña konosé otro di nobo.”
Kada pais a haña e posibilidat pa duna un presentashon di e desaroyo- i nesesidatnan di su ofisina di impuesto. Asina Aruba por a mustra kon entre otro el a implementá un sistema integrá ku éksito, ku lokual no solamente a digitalisá tur papel di impuesto kasi kompletamente, sino tambe a outomatisá elaborashon di pago ònlain hasí dor di kliente. Pa medio di esaki, tambe por a sostené implementashon tékniko di reformashon di impuesto resien ku entre otro un konekshon direkto ku e sistema Asycuda di Ofisina di Duana. Tambe a trata ku e plannan pa e añanan benidero, i a para ketu na e retonan ku digitalisashon ta trese kuné, manera seguridat di dato i aksesibilidat di e organisashon pa por proveé nesesidat di su kliente mas mihó.
Hopi kambio ta tumando lugá na Ofisina di impuesto di Kòrsou. Ya a implementá diferente mehorashon, i pa e añanan benidero ainda tin diferente desaroyo planiá. Lo hasi uso di diferente hèrmènt, asina ku e empleadonan por konsentrá mas riba problemátika di kontenido en bes di asuntu atministrativo. E proyektonan ku a ehekutá ta enfoká riba prevení eror, subi efektividat, i realisashon di mehorashon struktural.
Na Sint Maarten, for di 2022 tin preparashon ta tuma lugá pa modernisashon di e infrastruktura di IT antikuá. Ademas, Ofisina di Impuesto ta lucha ku falta di personal. Den e Pakete di Pais ta presta hopi atenshon na esaki, i ta hasi e medionan nesesario disponibel pa reformá e Ofisina di Impuesto i pa drecha e servisio na kliente.
Ofisina di Impuesto CN for di 10-10-10 a subi un kaminda kompletamente nobo. Aki por pensa na legislashon fiskal, responsabilidat atministrativo, i repartishon nobo. Durante e 13 añanan ku ta tras di lomba, e servisio kontinuamente tabata den desaroyo, tantu na nivel organisatorio, teknológiko, komo di servisio. Di hopi papel, e organisashon a bai kasi kompletamente digital, a subi ingreso, i a hasi e prosesonan mas efisiente.
E presentashonnan di e paisnan a klarifiká kuantu área komun tin den e retonan. Pensa na digitalisashon i seguridat di sistema, reklutamentu di forsa laboral adekuá, i interkambio di ‘lessons learned’. Na e momentu ei mes, a tuma e promé pasonan pa bishitá otro mediante entre otro konsulta di sekshon, posibilidat pa kapasitashon, i interkambio di eksperensia pa fortalesé otro.
TWO ta wak bèk ku hopi satisfakshon riba e promé seminario di trabou aki di e Ofisinanan di Impuesto, i mediante e Paketenan di Pais ta sigui duna apoyo na modernisashon di e Ofisinanan di Impuesto di Aruba, Kòrsou, i Sint Maarten.
