Kongreso Legislativo di Reino 2024: Kolaborashon for di nos mes forsa
Riba djabièrnè 22 di mart a konkluí e promé Kongreso Legislativo di Reino Kolaborashon for di nos mes forsa. Durante e dianan aki mas ku 50 partisipante for di Aruba, Kòrsou, Sint Maarten i Hulanda a laga inspirá su mes pa medio di lektura- i tayernan interaktivo. Entre otro, tabatin tayer di trabou riba traha nota di inisio, tratado di derechonan humano, kolaborashon ora ta trata di leinan di estado i AI den práktika hudisial tabata riba e agènda. Hurista ku ta traha komo empleado públiko (di gobièrnu sentral), profesor, abogado, hues òf empresario a duna e tayernan. Tur dia tabatin un inspirashon pa e oradornan Maria van der Sluijs - Plantz, Sjoerd Zijlstra, Arjen van Rijn i Raúl Maduro. E kongreso tambe tabata un bon momentu pa e diferente funshonarionan legislativo sa di otro kiko nan ta traha riba dje i pa traha riba un nètwèrk.
Pakete di pais
E kongreso tabata un inisiativa di Organisashon di Trabou Temporal (TWO) den kuadro di e inisiativanan den e paketenan di Aruba, Kòrsou i Sint Maarten. Pa medio di e paketenan di pais, tur tres pais tin e reto di mester adaptá diferente lei (antikuá), pero no tin sufisiente personal pa hasi esaki.
Deseo pa traha huntu
E deseo pa traha huntu tabata liña kòrá den e kongreso, tantu dor di e partisipantenan, komo e oradó- i mandatarionan. Na final di e kongreso Sekretario di Estado di Relashonnan den Reino Alexandra van Huffelen i Minister di Asuntunan General di Kòrsou Gilmar Pisas a uni nan mes na enkuentro. Ku kontribushon di e paritispantenan, e hefenan di e Departamentunan Legislativo i Kasonan Hurídiko Meerjam Deekman (Sint Maarten), George Croes (Aruba) i Jennifer Pawirodihardjo-Fer (Kòrsou) a presentá kua ta e posibilidatnan i posibilidatnan di sosten ku tin pa huntu fortifiká e funshon legislativo i ehekutá e reformanan.
Sekretario di estado Van Huffelen: “E kongreso legislativo aki ta mustra kon sumamente importante boso ròl komo hurista legislativo ta den e palèt amplio di reforma na kaminda pa un ekonomia resiliente. Kolaborashon i kordinashon, ei e ta kuminsá. I esaki ta posibel solamente dor di trese hende manera boso huntu ku ta kontektá ku otro, kompartí eksperensia i sostené otro. Pa motibu ku ounke boso ta traha den diferente tereno, boso tur ta forma parti di e kadena hudisial ku ta kontribuí na e siguridat legal na Aruba, Kòrsou i Sint Maarten.”
Minister Pisas: “E dianan aki a mustra ku tin nesesidat pa kompartí konosementu i pa konektá ku otro, pa motibu ku den hopi kaso nos ta konfrontá retonan similar. Tin problema sosial grandi ku mester solushoná. Den e sala aki tin hopi konosementu i eksperensia. Kisas e teknologia por yuda nos tambe pa traha mas efisiente. Nos no mester pensa solamente riba problema, sino tambe riba solushon i opshon kreativo pa por trese mehorashon. Manera mehorashon di kalidat di lei. Na final di dia, ta importante pa nos hasi nos trabou pa bienestar di nos komunidat.”
Ku e tipo di eventonan aki TWO ke fortifiká e laso entre e paisnan den reino i stimulá kolaborashon. Banda di esei ta duna sosten (finansiero) na unda ta nesesario pa ehekutá e trayektonan.
