TWO su Rapòrt Anual 2023: Krea sinergia
E Organisashon di Trabou Temporal (TWO) a publiká e relato anual pa aña 2023. “E relato anual aki ta wak bèk riba e di tres aña ku Aruba, Kòrsou, Sint Maarten i Hulanda a traha huntu riba implementashon di e Paketenan Nashonal. Un aña ku e areglo mutuo nobo Kolaborashon riba Reforma a dominá, e transishon di investigashon pa implementashon i, mas ku tur kos, krea sinergia”, segun Judith Jeurissen, gerente di programa di e TWO den e prólogo. P’esei “Krea sinergia” ta e tema di e relato anual.
Den e relato anual ta hiba e lektor entre otro na desaroyonan riba tereno di digitalisashon den e tres paisnan i e eksperensia di un ‘trainee’ di gobièrnu ku un konekshon profundo ku Sint Maarten.
Tambe tin historianan di e tres paisnan. Por ehèmpel Aruba Fair Trade Authority (AFTA) ta resaltá i kiko esei ta nifiká pa kompetensia pa empresarionan (chikitu). Tambe ta papia riba e importansia di un bon maneho finansiero pa Aruba, pa asina gobièrnu por responsabilisá na un manera responsabel.
Na Kòrsou nos ta lesa tokante e importansia di rebahá ‘Red Tape’ i e gastunan di hasi negoshi. Tambe ta trata e vishon di enseñansa na 2030: e mester ta duradero i mester por karga esaki finansieramente, i tur hende mester tin oportunidat igual pa desaroyá.
Na Sint Maarten, ta trata e enkuesta di poblashon den kondishonnan króniko. E resultadonan di esaki por yuda gobièrnu formulá un mihó maneho. Un otro artíkulo ta trata e reforma pa fortifiká e sistema di seguridat sosial i e merkado laboral di Sint Maarten.
Perspektiva finansiero
Finalmente TWO den perspektiva finansiero. TWO a gasta €19.7 mion na 2023 pa e implementashon di e Paketenan Nashonal. Na 2022 esaki tabata €14.2 mion i na 2021 €10.55 mion. Esaki ta trata di tantu finansiamentu di proyektonan (programa) komo gastunan pa empleadonan di e TWO, otro departamentunan hulandes i ekspertonan ku ta presta òf kontratá pa proyektonan spesífiko den e paisnan (aparato). E repartishon di gastu pa 2023 ta €14.0 mion pa programa i €5.7 mion pa aparato. A hasi un total di €3.1 mion na gastu regular di programa pa Aruba na 2023. Pa Kòrsou esaki ta €5.8 mion i Sint Maarten €5 mion.