“Hopi kos a sosodé kaba tras di kortina i hopi kos ta posibel kaba digitalmente”
Dia 3 i 4 di sèptèmber Ministerio di Desaroyo Ekonómiko den kolaborashon ku Curaçao Techmeetups a organisá algun seshon pa empresarionan. Meta di e seshonnan tabata pa deliberá prinsipalmente ku kompanianan di IT i empresarionan tokante opshonnan digital ku gobièrnu ta ofresé kaba na empresarionan i e prosesonan di digitalisashon ku ta planiá. Algun di e reunionnan tabata tokante e programa ‘Redusí burokrasia i gastunan di hasi negoshi’, medidanan for di e Pakete Nashonal.
“Meskos ku den tur asina yamá Small Island In Development States (SIDS), Kòrsou tambe ta sufri di un falta di kapasidat. Pero hopi ta sosodé tras di kortina i hopi ta posibel kaba digitalmente. Pero gobièrnu i kompanianan individual (speshalmente chikí) no semper ta komuniká esaki sufisiente,” Tamira La Cruz, gerente di programa E6 den Country Package ta bisa.
Durante e enkuentronan a mustra ehempel konkreto di prosesonan aktual. Shumiré Johannes-Ignacio, direktor di Lokèt di Pèrmit, a mustra ku ya kaba por apliká pa tur pèrmit ekonómiko kasi kompletamente digital. Solamente meter rekohé e pèrmit físikamente.
Tambe a trata plannan pa futuro. Sr. Jairo Belioso, gerente di programa pa e programa di Digitalisashon di Gobièrnu, a splika e prosesonan di digitalisashon ku ta planiá, manera identidat digital i e posibilidat pa registronan di gobièrnu komuniká digitalmente ku otro, e asina yamá Secure Data Exchange.
Dhariana Loth i Rashida Petronilia, di Ministerio di Desaroyo Ekonómiko i CINEX respektivamente, a kompartí e plannan pa loke ta trata e wèpsaitnan renobá di e dos organisashonnan. Lo presentá e informashon regulatorio kompletu, kla i koherente, tambe ku yudansa di AI/Machine Learning. E presentashon di notario Kandidato Mr. Dr. Katherine Filesia tokante digitalisashon di ofisinanan di notario i e ròl di notarionan den empresario tambe a duna un bon bista.
Den e seshon di Biz2Biz riba e di dos dia, empresarionan, tantu lokal komo den eksterior, a mustra ki servisio nan ta ofresé òf usa pa oumentá e efisiensia di empresanan chikí i mediano. Caetano Kluyver, Omaily Lucas, Joël Salas, Vincent van Rutten, Veronique Toulon, Rayni Rijke, Gideon van de Laar a presentá. E servisionan di e Sentoo lokal pa pago digital tambe tabata un éksito grandi den e seshon di anochi di Curaçao Techmeetups.
