Den su relato anual di 2024, Organisashon di Trabou Temporal (TWO) ta wak bèk ku e tema Forsa di Kolaborashon. TWO ta traha huntu ku Aruba, Kòrsou i Sint Maarten pa mas di kuater aña kaba riba ehekushon di e Paketenan di Pais. Tras di kortina, ámtenar i eksperto di e tres paisnan, den kolaborashon ku TWO i otro departamento hulandes, a bin ta traha duru riba e reformanan durante e último kuater aña.
“Den e relato anual aki, nos ta destaká algun di e trayektonan aki. Trayektonan ku ta duna un kontribushon duradero na mehorashon di outosufisiensia di e paisnan Karibense. Trayektonan ku ta mustra e forsa di bon kolaborashon den Reino i kon esaki ta haña un interpretashon diferente den kada trayekto, dependé di kiko ta kuadra mihó”, segun Judith Jeurissen, mènedjer di programa di TWO.
Proyektonan ku ta fortifiká di forma duradero
E relato anual ta enserá entrevista ku ekspertonan di Aruba, Kòrsou i Sint Maarten ku ta liderá proyekto ku ta den operashon kaba i ta fortifiká e paisnan di forma duradero. Na Aruba, Edwin Brugman ta papia di e reformanan den kuido médiko, unda e meta ta pa mantené kuido médiko pagabel i aksesibel. John de Lannoy ta papia tokante e desaroyo rondó di e transformashon di Servisio di Impuesto di Kòrsou, unda kalidat, transparensia i rapides mester bira e norma. Roxanne Howell i Candia Joseph ta papia di e maneho finansiero di Sint Maarten. Nan ta deskribí e pasonan konkreto ku ta tuma pa haña mas kòntròl riba finansa di gobièrnu pa medio di un mihó suministro di informashon finansiero. E lektor lo haña un bista tambe di diferente proyekto for di e Paketenan di Pais ku a kompletá na 2024.
Bista di pafó
Huntu ku e tres paisnan, TWO ta firmemente komprometé na un maneho finansiero saludabel, edukashon duradero i un aparato gubernamental ku ta funshoná bon. Tin biaha un bista di pafó pa wak si nos ta riba bon kaminda ainda ta hopi balioso.
“Pa e relato anual aki, nos a puntra Maria van der Sluijs-Plantz i Richard Doornbosch, kende a sigui e Paketenan di Pais for di komienso, kon nan ta mira lokual ku e kolaborashon a duna te ku awor. Tur dos ta deklará ku e forma spesial di kolaborashon di e areglo mutuo ta un éksito riba su mes. Un kolaborashon ku ta promové responsabilidat propio di e organisashon i sinergia di e paisnan. Si bo prepará esaki bon, lo bo disfrutá di dje pa dékadanan,” Jeurissen ta bisa.
2024 den perspektiva finansiero
Na 2024, TWO a gasta € 19.4 mion na implementashon di e Paketenan di Pais. Na 2023, esaki tabata € 19.7 mion i na 2022 € 14.2 mion. Esaki ta enserá tantu finansiamentu di proyektonan (programa) komo gastunan pa empleado di TWO i eksperto di otro ministerionan hulandes a kontratá òf fia pa proyektonan spesífiko den e paisnan (aparato).
Pa Aruba, a hasi un total di € 4.9 mion na gastunan regular di programa. Esaki pa gran parti a bai pa fortifiká e funshon finansiero i implementashon di e modelo di tres liña di defensa (€0.7 mion). Pa Kòrsou e gastunan di programa a suma €2.4 mion, di kual e parti mas grandi (€0.7 mion) a bai pa e programa Mehorashon di Funshonamentu di Gobièrnu. Sint Maarten a risibí €5.4 mion i a invertí mas tantu den e programa Futuro di Finansa ku €2.3 mion.