Kòrsou ta tumando un paso signifikante den direkshon di fortalesé su posishon ekonómiko dor di transformá su zona ekonómiko (E-zones) eksistente den Zona Ekonómiko Spesial (SEZ). E inisiativa aki ta parti di e Pakete di Pais i a keda desaroyá den kolaborashon entre Organisashon di Trabou Temporal (TWO), Ministerio di Desaroyo Ekonómiko (MEO) i Ministerio di Finansa.
Imágen: © CTB
Maneho resistente pa futuro i sostené ampliamente
E zonanan ekonómiko aktual ta luchando ku entrada ku ta bahando pa basta aña, kousá pa faktornan manera entre otro kambin den regulashonnan internashonal, e desaparishon di e merkado Venezolano, opstákulonan burokrátiko i gastunan relativamente haltu. Sinembargo, investigashon ta mustra ku un aserkamentu moderno basá riba mihó práktikanan internashonal por ofresé Kòrsou oportunidat ekonómiko nobo. Implementá un maneho ku ta resistente pa futuro i sostené ampliamente pa e e-zones ta un responsabilidat konhunto di Minister di Desaroyo Ekonómiko i e Minister di Finansa. Koperashon i kordinashon estrecho entre tur dos ministerio i stakeholder relevante ta esensial. Solamente pa medio di esfuerso konhunto i un vishon kompartí e kuadro di maneho nobo por keda tradusí efektivamente den legislashon i implementashon práktiko, ku bista riba e desaroyo ekonómiko duradero di Kòrsou riba término largu.
Kresementu Ekonómiko Sostenibel
Den liña ku e responsabilidat kompartí aki, Ministerio di Desaroyo Ekonómiko i Ministerio di Finansa a embarká riba un proseso signifikante pa desaroyá maneho i strategianan struktural pa modernisashon, sostenibilidat, i revitalisashon di e zonanan ekonómiko di Kòrsou. Ku e maneho aki, ámbos ministerio tin komo meta pa transformá e zonanan ekonómiko den áreanan kompetitivo i luktrativo ku ta kontribuí na kresementu ekonómiko duradero i ku ta krea kupo di trabou riba e isla.
Minister di Desaroyo Ekonómiko, Roderick Middelhof:
"E transformashon di nos e-zones tradishonal pa Zonanan Ekonómiko Spesial (SEZ) ku ta resistente pa futuro ta un logro den e maneho ekonómiko di Kòrsou. Ku e inisiativa aki, nos ta kumpli ku nos ambishon pa bira un sentro ekonómiko duradero, inovativo, i kompetitivo den Karibe.
E modernisashon aki ta permití nos atraé sektornan nobo, mehorá e klima di invershon, i krea empleo di kalidat haltu pa nos poblashon." E reforma aki ta mas ku un kambio di maneho; e ta un eskoho stratégiko pa hasi Kòrsou resistente pa futuro. Dor di invertí den inovashon, sostenibilidat, i kolaborashon, nos ta konstruyendo un ekonomia resiliente ku ta krea oportunidat pa nos hendenan i ta atraktivo pa partnernan internashonal.
Rango mas amplio di aktividatnan
E transishon pa SEZ ta sostené un skala mas amplio di aktividat, inkluyendo diferente klùster di teknologia, inisiativa marítimo sostenibel i logístika spesialisá. Lo realisá e transishon kuidadosamente i den fase, i mester kumpli ku guianan internashonal di organisashonnan manera e Organisashon pa Koperashon i Desaroyo Ekonómiko (OECD). E aserkamentu den fase aki ta krusial pa garantisá un transishon stabil i sostenibel.
Simultáneamente, legislashon ta wòrdu modernisá. Pa atraé invershon i stimulá aktividat ekonómiko, tambe ta esensial pa simplifiká prosesonan atministrativo i mehorá e klima empresarial. Ademas, e polítika tin komo meta pa introdusí insentivonan fiskal i no-fiskal apropiá, manera redukshon di impuesto, prosesonan atministrativo simplifiká, i sosten pa modelonan di negoshi inovativo.
Plannan konkreto
A traha plannan konkreto pa permití e transformashon aki, ku énfasis riba desaroyo di e e-zones ku ta resistente pa futuro. Proposishonnan ta inkluí establesimentu di un Blue Economy Innovation Hub, fasilidatnan di prosesamentu di kuminda sostenibel, i sentronan di distribushon di fris i frishidèr avansá teknológiko, tur dirigí riba fortalesé un ekonomia sostenibel i kompetitivo na Kòrsou.
Ku e transformashon aki, Kòrsou ta posishoná su mes komo un sentro ekonómiko fleksibel, kompetitivo, i konsiente di medio ambiente den e region.