Kòrsou a logra ekonomisá mas o ménos 41 mion florin karibense riba gastunan di alohamentu di gobièrnu entre 2020 i 2024 kompará ku e presupuesto di 2020. Esaki por konkluí for di un evaluashon di Rijksvastgoed Bedrijf (RVB) di Gobièrnu Sentral hulandes riba e medida B10 for di Pakete Nashonal di Pais di Kòrsou. E medida aki tin komo meta pa redusí gastunan di alohamentu di gobièrnu ku 20% denter di sinku aña (2020–2025). E loke a logra ekonomisá ta suma un redukshon di 21.5%, teniendo kuenta ku inflashon di e último añanan. Ku esaki a logra e meta stipulá.
Imágen: © Nydia A.
Resultadonan interino klave
For di e rapòrt por saka vários resultado interino importante. Por ehèmpel, a fiha un maneho di alohamento na 2023, loke ta permití gobièrnu pa haña mas kòntròl riba gastu, kalidat i sostenibilidat di edifisio. Ademas, a renegoshá e kontratonan di hür i a logra ekonomisá mesora ku e relokashonnan.. A lanta e Grupo di Trabou di Alohamentu di Gobièrnu pa kordinashon interdepartamental. Tambe a desaroyá rekomendashonnan pa redusí gastunan di energia i garantisá uso mas efisiente di propiedat.
Rekomendashonnan
Apesar di e resultadonan ku a logra, e evaluashon ta enfatisá e nesesidat pa protekshon struktural. E rekomendashonnan di mas importante ta e establesimentu di un departamentu di Propiedat Inmueble (Vastgoed) bou di e Ministerio di Tráfiko, Transporte i Trafikashon Urbano (VVRP) pa profeshonalisá maneho integral di propiedat inmueble (vastgoed), e desaroyo di un sistema di finansiamentu sostenibel pa maneho i mantenshon di propiedat inmueble, i e implementashon di medidanan di spar di energia pa redusí gastunan di operashonal strukturalmente. Mester desaroyá Business Case pa garantisá un balansa sano entre propiedat i hür, e maneho di alohamemtu mester ta obligatorio, i datonan di hür i propiedat mester ta aktualisá pa un maneho efektivo.
Konklushon
Ku e medida B10 den Pakete di Pais, Kòrsou a tuma pasonan importante pa un uso mas efisiente di alohamentu di gobièrnu i ekonomisashon signifikante di gastu. Na mes momento, awor ta krusial pa sigui ku reformanan struktural, pa asina por konsolidá e resultadonan ku a logra i ta garantisá e kalidat di maneho di propiedat inmueble riba termino largo.