Riba 14 di aprel 2026, representante di institushonnan di enseñansa i di konosementu for di parti Karibeño i Europeo di Reino hulandes a firma e agènda di konosementu pa henter Reino (Koninkrijksbrede Kennisagenda). Esaki a tuma lugá durante e konferensia di trabou di tres dia ‘Stop braindrain, start braingain!’, tení for di 13 te 15 di aprel 2026 na Aruba, ku delegashonnan for di Aruba, Boneiru, Kòrsou, Saba, Sint Eustatius, Sint Maarten i Hulanda.
Imágen: Ashtronaut Photography
Representante di institushonnan di enseñansa i di konosementu for di parti Karibeño i Europeo di Reino hulandes
Durante un mishon di konosementu na 2024, a señalá e nesesidat pa un kolaborashon mas intensivo entre institutonan di enseñansa i di konosementu den e parti Karibeño i Europeo di Reino. A formalisá e kolaborashon establesé den un Letter of Intent (LoI). Desde e momento ei, a lansa e promé inisiativanan i e kolaborashon a bira mas visibel.
E agènda di konosementu pa henter Reino firmá resientemente ta marka un etapa nobo den e desaroyo di un kolaborashon struktural den Reino i ta indiká un kontinuidat di e Letter of Intent firmá na 2024. Ku e firmamentu, representante di diferente instituto di enseñansa na diferente nivel den Reino ta mustra nan kompromiso pa sigui traha huntu riba un agènda di trabou komun. Sentral den esaki ta e fortifikashon di éksito di studiante Karibeño i mehorashon di e aliniamentu entre enseñansa i merkado laboral riba e islanan.
“Stop braindrain, start braingain!”
Representantenan di gobièrnu, enseñansa i merkado laboral ta kompartí un ambishon komun: desaroyá, retené i atraé talento den e parti Karibeño di Reino. Gerlien Croes i Geoffrey Wever a duna mensahenan inspirativo enfatisando e importansia di e tema aki i di e konferensia di trabou ‘stop braindrain, start braingain’. Ministerionan di enseñansa di Aruba, Kòrsou, Sint Maarten i Hulanda, den kolaborashon ku Strategic Education Alliance (SEA), Tijdelijke Werkorganisatie (TWO) i Platform Education & Labour Aruba (PEL) a organisá e konferensia.
Inspirá pa e rapòrt ‘Braingain: an integrated approach’ di e komishon di konseho di SEA, e partisipantenan for di tur sektor a traha riba pasonan konkreto pa 2030. E enfoke tabata riba desaroyo di medidanan pa kontrarestá brain drain, fortalesé enseñansa lokal, promové mobilidat i kolaborashon i mehorá e aliniamentu entre enseñansa i merkado laboral. Esakinan a wordo tradusí den un plan di trabou komun, práktiko, ku prioridatnan kla, responsabilidatnan i siguiente pasonan.