Tijdelijke Werkorganisatie (TWO) a publiká su relato anual di 2025. E tema: Mantené rumbo.
“Aña 2025 ta e aña kaminda hopi reforma den e Pakete Nashonal a kuminsá kana. Pero tur hende sa: na mitar di kaminda di e biahe, riba laman ganchu, e reto hopi biaha ta mas grandi. Laman brutu, bientu kontrali i desafio inesperá ta hasi un apelashon grandi riba e poder di perseverá i kapasidat di improvisá. Mantené rumbo, ahustá bela i trabou di tim ta nesesario pa drenta haf na un manera sigur”, asina manager di programa TWO, Judith Jeurissen ta bisa den e prólogo.
Imágen: © Tijdelijke Werkorganisatie / Creativa Graphic Design
Den 2025 e kolaborashon entre TWO i partnernan di kolaborashon for di Aruba, Kòrsou i Sint Maarten a sigui profundisá i bira mas fuerte. Esaki ta basá riba rèspèt, komplementaridat i konfiansa. Por lesa esaki den diferente entrevist ku partner di kolaborashon i lider di proyekto ku tur dia ta enkargá ku ehekushon di e Pakete Nashonal.
“Nan mester ankra e reformanan na un manera duradero i ta meresé tur elogio pa nan trabou duru”, segun Jeurissen.
Tópiko ku ta toka
E relato anual ta duna un bista tras di kortina di tópiko manera seguridat sosial, enseñansa i ekonomia. Tópiko i proyekto ku ta toka komunidat direktamente. Pensa riba reforma riba hasi merkado laboral mas atraktivo, modernisá enseñansa òf fortalesé konosementu di empresario lokal den sektornan kresiente manera orange-economy.
Enfatisá forsa di kolaborashon
Tambe e entrevistanan ta enfatisá e forsa di kolaborashon entre Aruba, Kòrsou i Sint Maarten ku Hulanda. “Esei ta e kos bunita di e Pakete Nahonal. E tim lokal i e tim na Hulanda a forma un vínkulo dor di e programa aki. E komunikashon ku TWO ta profeshonal i aksesibel. Nos sa kon haña otro i tin komprenshon pa e konteksto di Sint Maarten. E kolaborashon realmente ta esei: kolaborashon!”, un di esnan entrevistá ta bisa.
TWO den sifra
Na 2025 TWO a saka €21,2 mion pa traha riba e paketenan di país. Na 2024 esaki tabata € 19,4 mion i na 2023 € 19,7 mion. Esaki ta trata tantu finansiamentu pa proyekto (programa), komo gastu di personal di TWO, otro ministerionan hulandes i ekspertonan ku ta fiá òf kontratá pa proyektonan spesífiko den e paisnan (aparato).
Na Aruba a hasi invershon grandi den e funshon finansiero (€ 1,5 mion) i drecha e merkado laboral (€ 0,6 mion). Na Kòrsou den e sistema di finansiamentu i un sistema di registrashon den enseñansa i desaroyo ekonómiko (€ 0,6 mion). I na Sint Maarten a pone hopi atenshon na fortalesé e funshon di HR i renobá IT (€ 2 mion), e progama Future of Finance (€ 1,8 mion) i diferente proyekto na e ofisina di impuesto i pa drecha e klima di invershon.