Den e periodo ku ta tras di lomba a tuma vários bon paso padilanti den ehekushon di e Pakete Nashonal. Asina, na sèptèmber a start e proyekto modernisá Legislashon di Enseñansa, den kua lo bai traha riba introdukshon di e Wet op het Speciaal Funderend Onderwijs (Lei Enseñansa di Fundeshi Spesial).
Tambe trabou desididu ta tumando lugá riba organisashon di un Direktiva Suministro di Informashon i Digitalisashon nobo den e Ministerio di Maneho di Gobernashon, Planifikashon i Servisio Públiko (BPD), di moda ku Kòrsou lo ta mihó posishoná pa e era digital. Den e ministerio ei tambe lo start ku un trayekto importante pa mehorá funshonamentu di e organisashon di shared service (SSO) di gobièrnu. Dor di digitalisá, standarisá i outomatisá e prosesonan, un organisashon mas efisiente i mas manehabel ta surgi. Esaki ta resultá den redukshonnan di kosto direkto i finalmente tambe ta na benefisio di e servisio di gobièrnu na siudadanonan.