Pregunta i e kontesta

E paketenan nashonal ta kontené e akuerdonan entre e paisnan i Hulanda tokante medidanan i e reformanan struktural ku mester tuma riba tereno finansiero, ekonómiko i atministrativo. Lo elaborá e reformanan den medidanan konkreto i implementá nan den proyektonan i programanan. E paisnan i Hulanda a akordá ku esaki ta e mihó manera pa traha huntu. TWO ta sostené e paisnan Karibense ku realisashon di e reformanan di e paketenan nashonal. TWO por hasi esei por ehèmpel dor di suministro di perisia (konosementu) for di ministerio hulandes òf asistensia tékniko. Elaborashon di e paketenan nashonal ta tuma lugá den agèndanan di ehekushon i plannan di ehekushon. E paisnan i TWO ta hasi esaki huntu. E agèndanan di ehekushon i resúmennan di e plannan di akshon ta públiko i por haña nan riba e página di Agènda di Ehekushon di e Pakete Nashonal i Reportahe di ehekushon i tambe e página di Dokumento.

E reformanan struktural i medidanan konkreto aspirá inkorporá den e pakete nashonal tin e siguiente metanan:

• hasi e ekonomia sólido i elástiko;
• restorá finansa públiko;
• mehorá siguridat sosial, kuido i enseñansa;
• fortalesé estado di derecho.

Ounke e paketenan nashonal pa e diferente paisnan tin mesun temanan i hopi bia mesun medidanan tambe, nan no ta kompletamente igual. Kada pais tin karakterístikanan úniko ku ta eksihí un enfoke na midí.

Hulanda a kumbiní e asina yamá paketenan nashonal ku e paisnan Aruba, Kòrsou i Sint Maarten. Den nan a akordá ku lo traha riba reformanan ekonómiko, finansiero, sosial, di estado di derecho i di institushon. Den e paketenan nashonal a formulá 45 medida ku ta kontribuí na e reformanan ei. Den transkurso di 2022 e promé resultadonan konkreto a bira visibel. Pensa na medidanan ku ta mehorá e klima di negoshi òf ku ta trata ku impuesto. E agèndanan di ehekushon i resúmennan di e plannan di akshon ta públiko i por haña nan via e website di TWO. Asina tur hende por sigui loke ta tumando lugá, di ki forma ta trahando na e diferente medidanan i ki ora ta ferwagt e resultadonan.

E ministerio di Asuntunan Interior i Relashon den Reino a lanta un Organisashon di trabou temporario (Tijdelijke Werkorganisatie, TWO) pa ehekutá e trabounan aki huntu ku e Paisnan i e ministerionan hulandes, ku ta suministrá perisia di kontenido i e paisnan.

TWO ta sòru tambe huntu ku e paisnan pa formulashon di un agènda di ehekushon i reportahe di ehekushon pa duna kontenido na e paketenan di pais. For di promé di februari 2021  Aruba i Kòrsou ta traha ku Agènda di Ehekushon, na Maarten esaki a kuminsá mas despues. Ta aktualisá i establesé e Agèndanan di Ehekushon kada kuartal. TWO ta e promé instansia di kontakto pa e paisnan si ta trata di e kondishonnan, medidanan i e proyektonan i programanan di reforma. 

Den TWO tin tres tim di programa: Aruba, Kòrsou, Sint Maarten. E timnan di programa tin komo tarea pa sostené i mónitòr e desaroyo i ehekushon di proyekto, programa i medida di órgano di gobièrnu i kompania di gobièrnu di e paisnan den relashon ku tópiko deskribí den un Pakete Nashonal. E timnan aki ta traha parsialmente na Hulanda (por ehèmpel pa deliberashon ku e ministerionan hulandes) i na e paisnan.

Regularmente ta sali vakatura via nos página Vacatures, www.werkenvoornederland.nl, www.rijksdienstcn.com i tambe riba página di Facebook di TWO..